呢把「天下第一」嘅龍椅就係安設喺故宮博物院太和殿嘅雕龍髹（jau4）金大椅。佢金光燦爛，高高在上。就好似喺电视剧入面睇到咁，清朝嘅皇帝就係坐住佢嚟舉行登基大典同各種重要嘅國家活動，接受文武百官同番邦使臣嘅朝拜。
龍椅作為皇帝嘅寶座，通常係選用名貴材料，經過能工巧匠嘅精雕細琢製作而成。雕龍髹金大椅由最珍貴稀有嘅金絲楠木製成，有一個圈椅式嘅椅背，上面精細咁雕刻咗13條栩栩如生嘅金龍。你知唔知？喺過去，龍係只有皇家先可以使用嘅圖案。龍椅背後係高大寬闊嘅雕龍髹金屏風，周邊對稱陳列仙鶴、香爐等禮器，尊貴無比，令到成個大殿顯得更加金碧輝煌，無比氣派！
呢座明代製作，一直沿用至清代嘅雕龍髹金大椅，後來曾經失踪咗將近半個世紀。究竟係咩回事呢？
原來，1915年，袁世凱篡權稱帝，用咗一張半中式半西式嘅大椅，代替咗殿內嘅雕龍髹金大椅。喺袁世凱呢把椅嘅椅背上面，有一塊白緞繡成嘅「袁世凱帝國」國徽。後來，呢塊白緞因為年久逐漸開裂，入面露出嘅填充物竟然係稻草。
1947年，故宮博物院希望復原太和殿嘅原貌，撤走咗「繡花草包大椅」，想換返清代嘅龍椅，但係揀咗幾個寶座都太細，同後面嘅雕龍髹金屏風唔協調，更加唔襯太和殿嘅宏偉氣派。你可能要問啦，「天下第一」嘅龍椅去咗邊度？仲搵唔搵得返？
真係多得文物專家、清史專家朱家溍（zeon3）先生。
1959年，朱家溍根據一張舊相上面嘅太和殿嘅原貌，喺一處存放殘破傢俬嘅庫房入面，搵到咗傷痕纍纍嘅雕龍髹金大椅。
1963年，故宮博物院決定修復呢件清代龍椅。經過專家同各行修復技師通力合作，歷時934日，呢件珍寶重放光彩，卒之又返到皇帝嘅「金鑾殿」。
其實，除咗太和殿入面最崇高嘅雕龍髹金大椅之外，紫禁城中仲保存咗各式各樣嘅寶座。宜家紫禁城成為咗故宮博物院，我哋都有機會行入呢座明清兩朝嘅皇宮，近距離欣賞呢啲只有真龍天子先可以端坐嘅寶座。第次再去，不妨做一次小導遊，同小伙伴講嚇寶座失而復得嘅離奇故事啦！
龍椅就係皇帝嘅寶座，通常會選用名貴材料，經過能工巧匠嘅精雕細琢製作而成。相傳，「寶座」呢個詞最早來自佛教，同皇家冇乜關係。宋明之後，「寶座」逐漸成為帝王御用坐具嘅代名詞，無論係個樣定係個名，都充滿霸氣，俾人一種高高在上嘅感覺。
去到清代，寶座所代表嘅權威性就更加突出。據說，雍正皇帝啱啱登基嗰陣，見到新嚟嘅小太監掃地嗰陣時，攞住掃把昂首挺胸咁喺寶座前面行過。雍正皇帝好嬲，覺得呢個小太監唔識規矩。跟住，佢曾經落過一道諭旨：「凡有寶座之處，行走經過，必存一番恭敬之心，急趨竄步方合禮節。」即係話，侍奉皇帝嘅大小太監，唔單止要竭誠效力主子，就算係對於主子坐過嘅寶座，都必須俯首躬身，急行而過，表示敬意。