你鍾唔鐘滑冰運動？呢個季節，正係滑冰嘅好時候。可能你以為，滑冰係從外國傳嚟嘅「外國貨」，話畀你知啦，我哋中國古代早已經有滑冰項目，嗰陣時叫做——「冰嬉」。故宮博物院珍藏嘅《冰嬉圖》就為我哋「直播」咗一場清代皇家嘅冰嬉活動。
根據史書記載，喺宋代就已經有皇帝喺宮中觀賞冰嬉嘅記錄，去到清代，冰上運動仲畀皇帝欽定為「國俗」添！
喺東北嘅滿族中，滑冰好早就開始流行啦。佢既係娛樂活動，又係軍事操練。清代隨住滿族入關，冰上活動亦成為北方冬季最重要嘅體育活動之一，並獲「國俗」之稱。你一定諗唔到，嗰陣時，滑冰、足球同埋摔跤係守衛京城部隊嘅軍事訓練項目吖！每年冬天，皇帝都會通過觀賞軍隊溜冰，嚟檢閱佢哋嘅訓練成果。
每年冬至之後，選手就要開始集訓。臘八前後，喺西苑太液池上（即係而家嘅北京南海、中海同北海）就會正式舉行宏大熱鬧嘅冰嬉活動。到時，會有一千四百幾名選手參與表演。皇帝由王公貴族同文武百官陪同，親臨冰場，睇官兵嘅冰上射箭比賽同冰嬉雜技表演。比賽嘅時候，皇帝坐喺華麗嘅船形冰床上，四周圍有八旗軍隊護衛，上千名冰嬉選手排好隊形競技表演，場面威武壯觀。乾隆皇帝曾多次叫畫家將冰嬉嘅場面畫成畫。你睇！你宜家見到嘅《冰嬉圖》，描繪嘅就係清代冰嬉嘅場景。威嚴嘅皇家儀仗、奮力角逐嘅參賽選手、豐富有趣嘅冰嬉項目，好似睇緊一場皇家嘅冰嬉「直播」！
著住冰鞋、列隊等候嘅八旗兵丁們早已經摩拳擦掌，準備大顯身手！佢哋等緊乾隆帝發出號令。只見御駕方向紅旗揮動，號炮一響，兵眾爭先恐後，好似射出嘅箭咁衝向皇帝面前。呢邊，皇帝同大臣們擘大對眼，氣都唔唞咁，凝神觀賞八旗健兒奔涌而來嘅精彩場面。轉瞬之間，頭幾名已經飛一般咁衝到御駕前摘取咗錦標。有啲選手衝得太猛，無法即時「煞車」，甚至要御前侍衛拉住佢哋減速。呢種八旗速滑大賽稱為「搶等」。
下一个節目叫「搶毬」——我哋可以稱之為「八旗冰上橄欖球」。選手們分紅、黃兩隊，御前侍衛將一皮球高高踢起，紅、黃兩隊群起紛爭，喧囂相逐，乾隆帝同臣僚哋睇到興高采烈。
但係更精彩嘅仲喺後面——冰上豎起咗三座彩扎嘅旌門。八旗健兒沿住劃好嘅彎道順序出場，曲折盤旋，喺旌門之間穿梭滑行，各施絕技，有一路滑一路舞叉弄棍嘅，有雙人叠羅漢嘅，有拈弓搭箭射門上彩球嘅......各種花樣滑冰令人目不暇接、眼花繚亂。
