你一定聽過「二月二，龍抬頭」，但係你有冇聽過「三月三，生軒轅」呢？喺古代，相傳舊曆三月初三係黃帝嘅誕辰，被稱作上巳（zi6）節，係一個紀念黃帝嘅節日。人們會喺呢一日去水邊宴飲，去郊外遊春。被譽為「天下第一行書」嘅《蘭亭集序》，就係喺呢一日誕生嘅，咁又係點回事呢？

　　魏晉時代，文人雅士們喺上巳節臨水宴飲，並且由此衍生出一項重要嘅遊戲——曲水流觴（soeng1）。曲水係指彎彎曲曲嘅溪流，觴係古代飲酒用嘅一種杯子。呢個遊戲點玩呢？就係將裝滿酒嘅酒杯放喺彎彎曲曲嘅溪水入面，順水漂流，喺邊個面前打轉或者停低，邊個就要即興作一首詩，作唔出就要罰酒喇。

　　話說喺永和九年（公元353年）三月初三，大書法家王羲之同親朋好友謝安、孫綽等42位名士，喺蘭亭玩曲水流觴嘅遊戲。有人詩興大发，出口成章；有人願賭服輸，一飲而盡。最後，王羲之為集會上嘅37首詩寫咗一篇序文——《蘭亭集序》。喺酒酣意暢之時，王羲之提筆喺蠶繭紙上面一氣呵成，全文總共324字，字字遒勁有力。因為係即興創作，難免有啲用詞不當嘅地方，於是佢喺紙上面做咗啲塗改。

　　第二日，王羲之酒醒後意猶未盡，仲想將呢篇序文重新寫一次。不過，佢點寫都寫唔出第一次寫嘅精妙。佢唔係好信，重寫咗好多次，都仲係搵唔到嗰種感覺。於是，呢篇喺遊戲入面創作完成嘅《蘭亭集序》，變成咗行書入面嘅巔峰之作，畀人們尊為「天下第一行書」。

　　如果你了解書法，就會知道現存嘅《蘭亭集序》都係摹本，佢嘅真跡究竟喺邊度呢？據說，王羲之將《蘭亭集序》視為傳家寶，代代相傳，一直傳到王家嘅第七代子孫智永。不過，唔知點解，智永出家做咗和尚，冇仔女，就將祖傳真本俾咗弟子辯才和尚。

　　去到唐朝初年，唐太宗李世民大量搜集王羲之嘅書法作品，據稱佢曾經三次問辯才攞《蘭亭集序》，都被拒絕。後來，足智多謀嘅大臣蕭翼，假扮成潦倒書生，借住永欣寺，慢慢同辯才結為至友，跟住套出《蘭亭集序》嘅下落，攞到真跡獻俾唐太宗。唐太宗攞到咗《蘭亭集序》，愛唔釋手，組織多位書法家臨摹，而且揀咗臨摹最好嘅收入內府，真跡就由自己保存。

　　咁大費周折攞到嘅珍品，梗係要「生生世世」帶喺身邊先得。唐太宗臨死嘅時候，落令用《蘭亭集序》嚟陪葬，所以後人就睇唔到《蘭亭集序》嘅真跡啦。長期以來，人們將唐代書法家馮承素臨摹嘅《蘭亭集序》視為「天下真跡一等」嘅最佳摹本。

　　你以為淨係得唐太宗鍾意王羲之咩？當然唔係。自古以來，鍾意王羲之書法作品嘅帝王唔少。清代嘅乾隆皇帝就特別鍾意王羲之嘅字。佢經常臨摹同題寫王羲之嘅作品，例如「快雪時晴帖」，喺四十九年內，一共題寫咗73次咁多。

　　諗到書聖王羲之同朋友喺「崇山峻嶺，茂林修竹，清流激湍」之間飲酒做詩，乾隆皇帝無限嚮往。於是，佢命人喺紫禁城嘅寧壽宮花園入面修建咗一座「禊（hai6）賞亭」，並且喺亭內鑿石為渠，渠長27米，曲回盤折，取「曲水流觞」之意，稱為「流杯渠」。乾隆皇帝成日同臣子們，喺度一齊體驗臨流賦詩嘅樂趣。

　　除此之外，乾隆皇帝仲收集咗有關「蘭亭」嘅八種本子，其中有虞世南、褚遂良、冯承素、柳公權、董其昌等多位書法大家嘅摹本同新作。乾隆皇帝命人將呢八種本子，刻喺同一條石柱上面，稱為「蘭亭八柱」。呢條石柱原本存放喺北京西郊圓明園，宜家經已移立喺北京嘅中山公園入面，而且築咗亭嚟加以保護。如果有機會去參觀，你會發現，有一個本子嘅落款係清高宗弘歷。冇錯！呢個版本嘅創作者就係乾隆皇帝本人，由此可見佢有幾咁鍾意《蘭亭集序》。