講起豬呢種動物，你會諗起咩嘢？得意嘅小豬佩奇，定係憨居居嘅豬八戒？細數文藝作品中以豬為原型嘅形象，真係唔少。你知唔知？喺中國古代，豬亦喺人們嘅生活中扮演各種角色，稱讚軍隊骁勇善戰，就會講好似豬咁勇猛；祝福人哋金榜題名，要送「大豬蹄子」；豬仲因為同皇帝「同姓」，差啲就從人們嘅餐枱消失，究竟係點回事呢？一齊嚟睇嚇啦。
喺舊石器時代咁早，豬經已進入咗人們嘅生活。嗰陣時人們會捕食野豬，不過野豬凶猛異常，有時連老虎都怕佢三分。所以，古人亦將野豬視為「勇敢」嘅象徵。例如喺甲骨文入面，勇敢嘅「敢」字，就係由「手」同「亥」（即係野豬）組成。因為古人認為徒手捕捉野豬最可以體現勇敢。例如王莽就將佢抵禦匈奴嘅軍隊命名為「豬突豨（hei1）勇」，亦都係希望軍隊可以好似野豬咁勇往直前，戰無不勝。另外，崇尚勇猛嘅滿族人亦將野豬作為佢哋嘅守護神之一。
去到新石器時代，人們經已成功將野豬馴化成為家豬，養豬嘅數量變成咗判斷一個人富唔富有嘅標誌，豬變成咗財富嘅代名詞，仲畀人們冠以「烏金」嘅美譽。大詩人杜甫曾經喺詩入面寫過「家家養烏金，頓頓食黃魚」，用嚟展現人們嘅富足生活。
對於重視「死後世界」嘅中國古人嚟講，過咗身後嘅「財富」都好重要。於是，人們會喺墓葬入面隨葬整豬、豬頭或者豬下頜骨。去到漢代之後，就改用玉豬、陶豬、陶豬圈等陪葬品。唔單止可以體現逝者生前享有嘅富足，仲可以亦表現佢哋希望喺另一個世界繼續富有嘅願望。
如今我哋成日以為豬又蠢又鈍，又污糟又臭，話俾你知啦！喺古代人眼中，豬係唔少人嘅吉祥物，因為佢哋圓潤、富態，被視為幸運、吉祥同圓滿嘅象徵。
例如喺唐代，豬就係莘莘學子祈求金榜題名嘅吉祥物。傳聞因為「豬」同「朱」，「蹄」同「題」諧音，所以每次有人趕考，親友就會送紅燒豬蹄俾佢，用嚟預祝佢可以朱筆題名。後來呢個習俗就逐漸演變成為人們喺新年互送火腿嘅習俗。除此之外，喺天津、河北等地，人們仲會將「肥豬拱門」視為福進家門、大吉大利嘅意頭。於是，家家戶戶過年都會貼上有呢個寓意嘅窗花。對於即將到嚟嘅豬年，老人們亦成日話豬年係「肥年」，風調雨順，五穀豐登，六畜興旺。
明代有一位正德皇帝朱厚照，生性荒唐貪玩，佢曾經落過一條既有趣又令人覺得莫名其妙嘅命令——禁止劏生豬。原來，呢位皇帝唔單止姓朱，仲係屬豬，神經過敏嘅皇帝將自己嘅姓氏屬相同餐枱上嘅豬聯繫埋一齊，見到百姓每日劏豬食肉，令佢覺得好唔自在。於是，佢就落咗一道聖旨，話人們食豬肉係對皇帝大不敬嘅行為，所以禁止人們養豬、劏豬、食豬。如果違反禁令，就要全家發配邊關充軍。咁樣嘅刑罰喺古代可以算係僅次於死刑嘅懲罰。於是，此令一出，即刻搞到人心惶惶。
當時正德皇帝正從京城出發，南下去揚州遊玩，沿途經過嘅河北、山東等地嘅村民為咗避開懲罰，只能夠喺皇帝嚟之前盡快將養嘅豬全部殺曬，減價發賣，跟住將剩返嘅豬仔都埋咗。咁樣，唔單止人們食唔到豬肉，就連祭祀嘅祭台上都唔見豬頭。
