經過秋收冬藏之後，春天嚟啦，新一輪播種開始啦。喺古代，令百姓食飽著暖係每個皇帝都要面對嘅頭等大事。每逢春耕時節，即使係日理萬機嘅皇帝，偶爾都會親自落地做嘢，客串農民伯伯，為天下嘅百姓做個表率。睇嚇！佢哋開始啦。
你知唔知？喺皇宮御苑入面，除咗金碧輝煌、雕梁畫棟嘅樓台殿宇，仲有一處古樸嘅院落——豐澤園。佢位於故宮以西嘅中南海內，呢度有康熙皇帝嘅「VIP試驗田」。每年，康熙皇帝都會喺豐澤園耕田，體驗嚇「果園老農」嘅別樣生活。
豐澤園入面種咗好多水稻，每年九月會迎嚟收割季。有一年嘅六月，水稻啱啱抽穗，康熙皇帝沿住田壟散步。突然間，佢發現其中一樖生得特別高。佢行埋去，仔細一睇，上面嘅稻粒竟然經已成熟。於是，康熙皇帝將佢摘落嚟收藏，決定留到明年試種，睇嚇佢仲可唔可以早熟。第二年，啱啱到六月，試種嘅水稻就成熟咗，個個粒粒饱滿。從此以後，豐澤園開始年年種植呢種早熟稻米，收成好到足夠供應宮中內膳房用嘅米。
皇帝每年都要出席各種各樣嘅祭祀典禮，祭先農就係其中之一。所謂「先農」，就係古代傳說中最早教民耕種嘅人。每年春天，皇帝都要率領文武百官去先農壇祭祀先農神，祈求新一年嘅風調雨順、五穀豐登。
祭拜之後，皇帝會親自耕作。喺《皇帝祭先農圖》第二卷嘅畫面上，可以見到呢場重頭戲嘅浩大繁複。朱紅色木製方台，係皇帝嘅觀耕台。台下左右兩側，各有6隻黑牛，拖住紅色木犁。而喺台下正中央嘅位置，仲有一隻身披黃衣嘅耕牛。可以見到雍正皇帝右手扶住犁柄，左手揮住牛鞭，喺田上面體驗緊生活。
同康熙相比，雍正皇帝嘅「親耕」只不過係一種儀式。從圖中就可以見到，喺御用耕牛尾部，仲有兩個彎腰拱背嘅人用緊力。
喺中國古代，男耕女織係每個小家庭嘅勞動分工。作為天下第一夫妻嘅皇帝同皇后，當然亦要夫唱婦隨。每逢春耕時期，皇帝唔單止自己祭祀、親耕，仲要求皇后舉行祭蠶神同親桑嘅儀式，為天下婦女作出榜樣，呢個亦都係由皇后主持嘅最高級別嘅典禮。
乾隆九年（公元1744年）初春，清廷舉行咗建國以嚟第一次先蠶禮。西苑太液池北端（宜家北海公園後門處）嘅先蠶壇上面支起咗黃色幕帳，帳內供有先蠶神螺祖嘅神位同各種祭品。孝賢皇后喺妃嫔（pan4）同宮女嘅陪同下嚟到祭壇，向蠶神跪拜、上香、獻祭品。
通常喺祭拜禮儀嘅次日，皇后會再次駕臨蠶壇，手持金鉤同金簍喺桑林中象徵性咁採幾片桑葉，跟住就登上寶座，觀看眾妃嫔同宮女採桑。呢啲桑葉會送去蠶室餵育蠶BB，優質嘅蠶繭之後仲會呈獻俾皇后，再由皇后獻俾皇帝同皇太后。
你睇，皇帝們嘅親耕活動，有時睇落更加似一場皇家「發布會」，但係成功咁將提倡農耕、鼓勵生產嘅精神，傳達俾全天下嘅百姓。
