-
行什
佢嘅造型好似一隻攞住寶器，後背生咗一對翼嘅神猴。喺中國所有嘅建築入面，只有太和殿嘅檐角上面出現過佢嘅身影。冇人知道佢嘅名，睇到佢排名第十，於是就有咗「行什」呢個名。傳說佢係雷震子嘅化身，可以防雷鎮火
-
鬥牛
傳說中嘅一種虬龍，遍體鱗甲，牛頭龍身。擅長吞雲吐霧，祈雨滅災。
-
獬豸（haai5 zi6）
傳說中嘅瑞獸，係忠誠、正義嘅化身，亦都係中國古代司法嘅象徵。傳說佢頭上有一角，可以辨是非曲直，見人相爭鬥，就會用角頂低邪惡無理嘅人。
-
狻猊（syun1 ngai4）
傳說中一種類似獅子嘅猛獸，頭上面披住好長嘅鬃毛。傳說佢係龍九個仔嘅其中一員，性情兇猛，可以食虎豹。
-
押魚
海中瑞獸。佢周身生滿鱗甲，身後仲有條魚尾。傳說佢可以興雲作雨，滅火防災。「押」有「執掌」嘅意思，所以佢係掌管水族魚類嘅統領。
-
海馬
海中瑞獸。佢嘅造型好似一匹馬，傳說可以入海臨淵，逢凶化吉。
-
天馬
天上嘅瑞獸，係龍嘅好朋友。佢同海馬一樣係馬，但係生咗一對翼，可以日行千里，追風逐日。
-
獅子
百獸之王。因為兇猛威嚴，人們用佢嘅形象嚟鎮守宮殿。
-
鳳
傳說中，鳳係百鳥之王。雄嘅叫「鳳」，雌嘅叫「凰」，鳳凰齊飛，係吉祥和諧嘅象徵，預示風調雨順，國泰民安。
-
龍
遠古時期，龍係氏族部落嘅圖騰；帝王時期，龍係皇家身份嘅彰顯；宜家，龍象徵中華民族。因為形象雄壯矯健，含義祥瑞吉慶，龍深受人們喜愛。
-
騎鳳仙人
傳說呢位仙人係戰國時期齊閔王嘅化身，作戰失敗，受敵軍追捕，喺佢走投無路嘅危急時刻，天邊突然飛嚟一隻鳳凰。齊閔王騎上鳳凰脫離咗險境。騎鳳仙人安坐喺屋簷嘅頂端，具有絕處逢生、逢凶化吉嘅象徵意義。
啱啱為大家介紹嘅係故宮太和殿垂脊上面嘅騎鳳仙人同10隻小獸。其實根據殿宇嘅級別差異，呢啲小獸嘅數量都唔一樣，最多嘅梗係紫禁城最大嘅宮殿太和殿，用咗十隻瑞獸裝飾，呢個係絕無僅有嘅一例，其它嘅建築最多都只可以用九隻，而有啲等級低微嘅建築最少嘅得一隻小獸。
喺華麗嘅外表之下，呢啲小獸其實仲有一個鮮為人知嘅小秘密。喺佢哋嘅身下，全部都隱藏咗一個鋒利嘅鐵釘，呢啲鐵釘可以將琉璃瓦好牢固咁固定喺檐脊 之上。小獸就好似鐵釘嘅帽，唔單止美觀，仲可以保護鐵釘唔受風吹日曬嘅侵蝕，真係一舉兩得。
中國宮殿全部都係傳統嘅木構建築，至怕遭遇雷擊火燭。呢啲造型多變、各懷神通嘅小獸裝飾，一方面突顯宮殿嘅威嚴，另一方面亦寄託祈雨防火、消災滅禍、逢凶化吉嘅美好願望。佢哋就好似美麗嘅小精靈，幾百年來經歷朝代更替同風霜雨雪，忠實咁守護腳下嘅宮殿，構成咗中國古代建築屋檐上一道獨特嘅風景線。