建造「蘇州園林」
大名鼎鼎嘅乾隆皇帝，好鍾意外出巡查，佢曾經六次南巡。都話「江南園林甲天下，蘇州園林甲江南」，一到江南，蘇州園林就吸引咗乾隆皇帝。
回宮後，乾隆皇帝就落令，喺紫禁城入面按照蘇州園林嘅樣，建造寧壽宮花園，為自己退休養老做準備。呢座花園位於寧壽宮區嘅西北角，亦叫做「乾隆花園」，花園入面亭台樓閣造型多變，黃、綠、藍、紫、翠藍嘅屋頂顏色豐富多彩，山石同室內裝修好多都直接來自江南，喺紫禁城莊嚴肅穆嘅氛圍中尤其顯得特別活潑生動。
乾隆皇帝特別鐘意蘇州園林入面嘅梅同終年翠綠嘅松柏、竹，因此，寧壽宮花園嘅建築物入面，就有用呢三種植物嘅圖案，作為裝飾或者命名嘅，例如「竹香館」、「三友軒」等等。花園入面仲露天種咗好多梅樹。北京嘅冬天非常寒冷，為咗梅樹可以溫暖過冬，人們會搭起暖棚，寒冬過後再拆咗佢。春風一過，梅花同桃花同時開放，十分美麗。
蘇式大廚帶入嚟
次次皇帝南下，當地官員都會聘請大廚，為皇帝整幾圍特色佳餚。蘇州菜講究色、香、味、型嘅整體效果，製作工藝上仲經常借鑑繪畫、書法、雕塑等技法，望落去賞心悅目，食起身齒頰留香。1765年，乾隆喺第四次南巡途中，品嚐咗廚師張東官嘅蘇州菜之後，讚不絕口。回京時，佢將呢位廚師帶返咗北京。
從此，蘇式菜餚、蘇式點心，成為皇帝御膳中嘅「常客」。「炒祭神肉」、「車厘子肉」等等，成為乾隆皇帝最鍾意嘅菜餚。就連皇帝後妃們嘅蜜餞、糖果等零食，都有埋蘇州嘅特色。最終，蘇式食品喺清代宮廷飲食中反客為主，成為宮廷飲食嘅主角。
齊齊用蘇州製造
故宮博物院目前藏有180幾萬件（套）藏品，其中好多同蘇州有關，有蘇州製造嘅傢俬、玉器、鐘錶等。最出名嘅莫過於「蘇繡」啦。
由順治初年開始，皇帝、皇后、皇子同公主嘅禮服、四季衣服，由江南三織造負責製作。江南三織造，係明清兩代宮廷設置喺江寧（宜家嘅南京）、蘇州同杭州，負責織造宮廷同官用嘅紡織品嘅機構。三織造之一嘅蘇州織造以蘇繡聞名，蘇繡針法多樣，繡工精細，配色秀雅。皇室大量嘅織繡品，幾乎全部出自蘇繡名藝人之手，包含服飾、戲衣、被面、枕袋、帳幔、靠墊、鞋面、香包、扇袋等方方面面。
後來，蘇繡喺技術上有咗新嘅發展，出現咗精美嘅「雙面繡」。即係喺同一塊底料上面，喺同一個繡製過程中，繡出正反兩面嘅圖像，輪廓完全一樣，圖案一樣咁精美，例如故宮乾隆花園符望閣入面嘅隔扇屏風，上面嘅刺繡，就係雙面繡。
呢件明黃色嘅皇后吉服，係慶賀大典同皇后生日嘅時候著嘅禮服，袍料梗係要用精美嘅蘇州刺繡。
此外，喺紫禁城入面，皇家建築地面上面鋪設咗蘇州生產嘅「金磚」，宮殿入面用嘅係蘇造傢俬，牆壁上面掛住嘅係蘇州名家嘅山水畫，屋頂有各種形狀各異嘅蘇州花燈，蘇州名醫為皇帝後妃們號脈睇病，蘇州嘅工匠被選調入宮廷造辦處，留低咗好多傳世珍品……紫禁城入面仲有咩係由蘇州搬過嚟嘅呢？有興趣嘅話，你去探尋下啦。