馬術——龍馬精神，千里奔騰
先秦時候，駕馭馬匹係君子必須掌握嘅技能之一。到咗明清兩代，紫禁城入面善於騎馬嘅皇帝都唔少。特別係清朝，天下係喺馬背上面奪得嘅。所以，為咗令國家嘅繼承者銘記祖先嘅辛勞同勇敢，騎射被列為皇子們嘅必修課程。為此，宮中仲設立咗養馬、管馬嘅機構——御馬厩（gau3）、上駟（si3）院。
喺清代皇室嘅好多宮廷畫卷之中，我哋經常可以見到骏马嘅身影。因為一到草豐馬壯嘅季節，清代嘅皇帝就會去木蘭圍場或者皇家御苑，展示自己嘅馬術技藝。佢哋會同蒙古各部首領，一齊觀賞八旗官兵嘅馬術表演。例如：有啲企喺馬背上面射箭，有啲喺馬上面雙手倒豎葱，有啲係雙人喺馬上雜耍，仲有啲喺奔跑嘅馬背上面吹笛……各種表演層出不窮，睇到人們眼花繚亂。
捶丸——宣德皇帝嘅高爾夫
高爾夫球運動因為禮節繁多，被稱為紳士運動。你知唔知？喺幾百年前嘅紫禁城入面，都流行咁樣一種打波入窿嘅紳士遊戲。明朝嘅宣德皇帝朱瞻基，就係呢種遊戲嘅發燒友。呢種遊戲嘅名字叫做「捶丸」，係宋元明三代相當盛行嘅一種休閒娛樂活動，王公貴族尤其鍾意，同高爾夫球有異曲同工之妙。
對於一般嘅遊戲項目，宣德皇帝唔會成日參與，佢只不過好鍾意將自己觀看比賽嘅情形畫成行樂圖。但係對於「捶丸」，佢就忍唔住要親自「行樂」一局啦。你睇！喺皇家嘅私人波地上面，地面修整得平服妥帖，冇咩障礙物。離遠睇，球洞上面一早經已插好彩旗作為提示。一條條球杆分門別類擺喺涼亭嘅長几上面，而且有專人看守照顧；多位太監仲作為「球童」，為皇帝遞上球杆。望落去，同宜家嘅高爾夫球真係有啲似添！
龍舟——龍舟破浪，競賽千年
清代嘅統治者喺入主中原之前，未有端午賽龍舟嘅習俗。但係進入中原之後，佢哋就變得好鍾意呢項活動。1725年，圓明園興修一新之後，雍正皇帝成日喺呢度居住遊樂、處理公務。每逢端午節，圓明園嘅福海都會舉辦龍舟競賽。唔單止係咁，觀看比賽嘅皇帝、王公大臣同皇后妃嫔（pan4）們，屆時都要著住漢服，打扮成漢族人，呢啲都算係賽場上另一道靚麗嘅風景啦。
清人畫胤禛十二月景行樂圖，其中一幅就描繪咗清代雍正皇帝親自主持端午賽龍舟嘅場景。可以睇到十幾支盛裝華彩嘅龍舟，喺圓明園福海嘅水面上面縱橫飛馳，仔細睇，一啲高高翹起嘅龍尾上面，仲有運動員喺上面或坐或立，表演各種驚險刺激嘅高難度動作。睇嚟，賽龍舟唔單止係一場緊張激烈嘅競技，仲係一場趣味十足嘅表演。「撲通！撲通！」可以睇到領前嘅兩支龍舟各有一名隊員跳入水，奮力爭奪驚慌失措嘅水鴨。雍正皇帝坐喺臨水嘅高閣上面，一路細品香茶，一路同後妃們欣賞呢場精彩絕倫嘅龍舟賽。
足球——御苑蹴鞠有絕技
蹴鞠喺中國係自古以來就有嘅運動，宜家經已被世界公認為中國古代嘅足球運動。喺當時嘅市井大眾同宮廷貴族之間都非常流行，軍伍之中有時仲會以蹴鞠訓練士兵。
古代嘅蹴鞠分為兩種。一種係有球門嘅築球，隊員負責交波，由球頭負責將球射入三尺高一尺左右大細嘅球門，如果冇射中但係由本隊隊員接住咗，依然可以傳俾球頭多次射門，但係如果個球落地就會輸一球，由另一隊開始傳球。另一種係冇球門嘅「白打場戶」，根據所踢花樣難度嘅高低論輸贏。參加人數為兩人至十人，踢法類似後來嘅踢毽。
喺宣德皇帝朱瞻基嘅呢場蹴鞠比賽入面，就係「白打」嘅玩法，雙方隊員各就各位。氣定神閒但係又花樣百出，爭住展示新練就嘅奇招俾皇帝睇，令人眼花繚亂，有時又突然有出人意料嘅假動作，擺出搞笑嘅姿態，氹到宣德帝拊掌大笑。嗰個皮球喺佢哋腳下一来一往，百十個回合依然勝負難分。
射箭——御苑彎弓，羽箭流星
滿族係北方強悍尚武嘅民族，以騎射打天下，清代歷代皇帝都非常重視騎術同射箭技能嘅傳統，紫禁城內嘅箭亭同箭亭廣場見證咗一代代射手嘅英姿。去到清末，現代火器逐漸普及，射箭嘅軍事意義幾乎完全消失，因此演變成純粹嘅競技體育項目。我國現代嘅射箭運動，就係繼承咗古代傳統射箭技術而發展起身嘅。
你睇！承德避暑山莊入面乾隆皇帝喺度練習緊射箭，此時經已係箭在弦上，正準備發射。乾隆皇帝箭法高超，經常可以一箭射落箭靶，所以靶旁邊有三個人輪流服侍重新安置靶心，執咗箭嘅侍衛就一路小跑咁返回發射點。乾隆帝身後有一排侍衛服侍佢，其中一人經已跨前一步，持箭恭立，隨時準備遞上去。
冰嬉——乾隆皇帝嘅溜冰大賽
乾隆皇帝多次強調要將冰嬉定為國俗，可見宮廷對冰嬉運動嘅喜愛程度。冬至過後，寒凝大地。紫禁城西邊，皇家嘅太液池湖面經已凝結成一面大冰鏡，喺百官同侍衛嘅扈從之下，皇帝坐住華麗嘅船形冰床，從岸邊滑向湖上嘅冰場。
著住冰鞋、列隊等候嘅八旗兵丁們一早經已躍躍欲試啦！除咗速滑大賽——「搶等」同冰上欖球——「搶毬」，最精彩嘅就係八旗嘅團體花樣滑冰運動。三座彩扎嘅旌門豎立喺冰上，八旗健兒們沿住劃好嘅彎道順序出場，曲折盤旋，喺旌門之間穿梭滑行，各施絕技。有一路滑一路舞叉弄棍嘅，有雙人疊羅漢嘅，有拈弓搭箭射中彩球嘅……各種花樣滑冰令人目不暇接、眼花繚亂。
一場場冰嬉之後都係皆大歡喜嘅賞賜，一啲技勇過人嘅得勝者仲得到乾隆帝嘅重獎。仲以冰嬉為題，同眾位文臣開始吟詩做賦，直到興盡回宮。
摔跤——龍騰虎躍斗跤場
喺清代宮廷畫家、意大利人郎世寧嘅《塞宴四事圖》入面，反映咗乾隆皇帝喺承德萬樹園筵宴文武同蒙古王公使臣嘅時候，善撲營表演「布庫戲」嘅場面。畫嘅上方有乾隆御筆，根據乾隆嘅御筆記述，清宮相撲主要有兩種：一種係清本民族即係滿族摔跤，跤手稱為「布庫」，脫帽、著靴、揎袖短衣裝束，只要將對方摔落地就係勝利，勝者赐酒。另一種係蒙古族摔跤，跤手稱為「布克」，脫帽，赤足，上身裸露，必須令對方頭部同肩部完全掂地先為勝，勝者赐羊肉。《塞宴四事圖》入面進行緊摔跤比賽嘅三對跤手，佢哋嘅裝束同動作形象，啱好反映咗呢兩種摔跤形式。