取暖係一件奢侈嘅事
喺先秦時期咁早，皇宮就經已開始諗辦法喺冬天為君王「供暖」啦。喺西周，就有三種取暖方式：第一種係喺屋入面生爐灶；第二種係將木炭放入爐入面取暖；第三種係用炭暖地，達到御寒嘅效果。嗰陣時，炭係「奢侈品」嚟㗎，只有皇宮同少數有錢人先用得起。
去到明朝、清朝，皇宮取暖經已發展得相當「先進」啦，甚至仲有咗專門負責「供暖」嘅後勤機構，例如明朝有負責管理宮入面柴草同冬季取暖嘅「惜薪司」，清朝有負責儲運宮中木柴、煤炭嘅「薪庫」。咁，宮入面有啲咩好玩嘅取暖方式呢？
火地取暖暖氣名稱：火地
你知唔知地暖呀？呢個係宜家冬季好流行嘅一種取暖方式。佢嘅原理係將水加熱，通過管道輸送到地板底下嘅水管入面，咁樣就算赤腳踩落地板，都會覺得暖笠笠。
其實喺紫禁城，都有呢種「地暖」，叫火地取暖，係明清皇宮冬季最主要嘅取暖措施。不過佢唔係利用熱水取暖，而係用熱氣。宮人們喺宮殿嘅地面下面，用磚石砌定循環嘅煙道，用燒火產生嘅熱氣嚟烘暖地面。除此之外，通過巧妙嘅設計，煙道仲可以通落床鋪下面，就好似我國北方嘅火炕咁，連床鋪都一齊變暖。
宜家喺景仁宮後殿嘅山牆外面、壽康宮東配殿廊下面、養心殿東暖閣山牆外面仲可以見到火地取暖嘅排煙口。
熏殿」小炭盆暖氣名稱：炭盆
睇過《紅樓夢》嘅小伙伴一定記得「黛玉焚稿」嘅情節。話說黛玉知道寶玉同寶釵訂婚嘅消息後，傷心到一病不起。佢覺得凍，於是叫丫鬟雪雁點燃火盆，將寶玉送俾佢嘅手巾同寫咗詩文嘅綸子全部放入火盆燒曬。由此可見，將點燃嘅木炭放喺盆入面，都係古人嘅一種取暖方式。
皇宮內冬季亦經常用炭盆取暖，清代叫作「熏殿」。即使到咗清朝，木炭依然好珍貴，所以炭盆取暖都唔係每一個人、每一座宮殿可以享受嘅。只有皇帝、太后、皇后、地位較高嘅嫔妃以及一啲重要嘅宮殿先可以使用。不過呢種炭盆取暖嘅方式都存在一個弊端，如果剩低嘅炭火冇處理好，可能會引起火燭。
清朝嘉慶年間有一日，乾清宮嘅掌火太監郝士通因為蛇王，冇完全熄滅木炭，就將炭放喺乾清宮東穿堂楠木隔旁邊。冇諗到，等佢走咗之後，木炭又再次燃燒，燒到木隔。等到大家發現有煙味、開門去睇，乾清宮經已燒起熊熊大火。呢次火燭，令到乾清宮、交泰殿、昭仁殿、弘德殿都化為灰燼，引起紫禁城「高層」對防火工作嘅高度重視，佢哋仲總結制定咗宮中救火措施同紫禁城火班章程添！
當時嘅「暖寶寶」暖氣名稱：手爐、腳爐
人冷先冷四肢，古人當然知道呢個道理，所以佢哋發明咗手爐、腳爐取暖嘅方式。冬天，喺手爐、腳爐入面裝炭，可以暖手暖身，仲可以隨身攜帶，就好似我哋宜家用嘅暖寶寶咁，方便實用，令人喜愛。
為咗方便傳溫，手爐同腳爐大多數係銅做嘅。作為宮廷用品，手爐同腳爐仲要顧及美觀，所以都有珐琅（faat3 long4）鑲嵌材料嘅，周身雕刻咗精美嘅鏤空花紋。為咗方便攜帶，匠人們仲為佢設計咗小提手。再加埋好多精巧嘅設計，爐中雖然裝住炭火，但係爐體唔會焫手，溫度啱啱好。
多得呢啲大大細細嘅「暖氣」設備，皇帝一家人先可以舒適咁度過寒冷嘅冬天。點啊？明清皇宮嘅取暖方式係唔係都好「時尚」呢？
